Sunday, May 4, 2008

حقوق الانسان ، يوسف المحيميد ، زيادة الرواتب

اهلا وسهلا من جديد
في هذه التدوينة وغيرها من التدوينات في هذا القسم سأحاول ان اسرد الخبر واضع تعليقي الخاص عليه ، كنوع من حرية التعبير عن الرأي ، كذلك لنسمع منكم الاراء والتعليقات على ذلك

1-الجمعية الوطنية لحقوق الإنسان تصدر بياناً حول زيارة وفد الجمعية لوزارة الصحة
السالفه ومافيها انو وفد من الجمعية زار (معالي) وزير الصحة ودردشو معاه عن وضع وزارة الصحة والخدمات السيئة اللي يعاني منها المجتمع . المهم ، الرجال صاحبنا(المعالي) حسب السالفة فضفضة وفش خلق ، قام طلب صحن (زعقا) وبراد ( كبوص) وقعد يشتكي من الوضع وانه هو مسكين مافي يده شي ، وان المشكله كلها من الماليه وهي تتأخر في المستحقات ،والجماعه رخو له الحبل ، وبس يهزو روسهم ، لين خلص من الفضفضه ، ويجيك اليوم الثاني بيان طويل عريض من لجنة حقوق الانسان تقول ان (المعالي) يشتكي من وزارة الماليه وانه ( وده يخدمكم يا شعب يا زلايب) بس العين بصيره واليد قصيره . صاحبنا المعالي وقت شاف الصحف تتناقل الخبر انهبل ، قال صدق لا قالوا ، الهبل لا تخليه ***** ، احنا وثقنا فيهم وعطيناهم اسرارنا قامو فضحونا ، ورد يقول في بيان انو مالكم حق تتكلمو باسمنا وبالعكس الماليه احسن ناس ومو مقصرين معانا ( لازم يرقع) ، قامو جماعة حقوق الانسان ردو بهالخطاب الناري . وبكذا يكون صاحبنا المعالي خسر ( مصداقيته مع الماليه ، ومع حقوق الانسان) .
قليلا من الدهاء يا معاليك . انتهى

2-روائي سعودي يواجه النقد لقبوله دعوة من صاحب "آيات شيطانية"
قبل ايام سمعنا ان الروائي يوسف المحيميد سافر امريكا لحضور مؤتمر ينظمه المدعو (سلمان رشدي) صاحب كتاب ايات شيطانية الذي يتطاول فيه على القران والاسلام ، صاحبنا ماصدق خبر ، راح على اول طياره ، وقت سألوه الناس ليه كذا يابو يعقوب؟؟ يعني تحط يدك في يد شخص سب القران الكريم ، رد صاحبنا ويقول انها فرصه لي عشان اوريه تسامح الدين واتحاور معاه ، لا يا شيخ؟؟ صدقتك تري
يذكرني بسالفة واحد يظهر على شكله التدين والمحافظه ، شافوه رايح جاي على هالمرقص، قالو له يعني ما تستحي على نفسك ؟ قال لا تفهموني غلط يا جماعه ، انا قاعد انصحهم يبطلو من هاللهو والمجون ، والى اليوم وصاحبنا ينصح
طيب انا اقول لك يا حضرة الاديب يوسف المحيميد ، اتوقع انو ودك في جائزه ترفع اسهمك في السوق شوي،
وبكره نشوف

3-الاسد يعلن زيادة الرواتب
سمعنا اليوم ان سوريا زادت رواتب الموظفين ، وقبل ايام مصر ، وقبلها دول خليجية ومنها السعودية
وهنا جا في بالي احط سؤال واشوف قدرة ذكاء الزوار ، اختبار قدرات يعني ، وانتبهو ترى الاجابة تحتاج تفكير وفيه تركات وفيه دول مالها دخل ، ولاتنسو ان فيه بلد يعتبر اكبر مخزون نفط في العالم ، وفيه بلد عددهم اكثر من 70 مليون اممممممم ، طبعا جميع الارقام من خانتين ، لأني ما اتخيل في احد بيسوي زياده برقم من خانه وحده .
السؤال ، وصل بقلم الرصاص بين اسم الدولة وبين نسبة الزيادة ، توكل على الله وابدأ
النسبة:ا
a-25%
b-30%
c-70%
d-05%
e-90%

اسماء الدول :ا

1-مصر
2-سوريا
3-السعودية
4-قطر
5-الامارات
6-جمهور الهلال

نلتقي على خير في وجهة جديدة

5 comments:

Anonymous said...

سلمت يداك ... وسلم عقلك وتفكيرك .. دائما مبدع

وتعليقي بالنسبه للجمعية والوزارة .. كلهم يحبون الانتشار على الصحف .. وكلو كلام بدون افعال رغم ان الجمعيه لسه في بدايات تجميع المعلومات لكن اتمنى ان ارى تحركات فعلية..
وبالنسبه للمحيميد ... نفس حب الانتشار على الصحف – كما سبق للجمعيه والوزارة- !!! وانت ما قصرت.
وبالنسبه للزيادات .. لا تعليق لانه يجيني مغص عند المقارنه بين خمستنا وزيادات دول الجوار.
وعلى فكره السؤال صعب " فيه تقارب" بين النسب .......اااه يا بطني

Anonymous said...

دائماً نحن على موعد مع أفكار قلمك اللاذع يا عزيزي أنور

ببدأ أعلق على المواضيع كل واحد على حده

1- أما وزير الصحة صاحبنا إللي ياكثر ماتشوف تصريحاته وصوره في الجرائد وهو مافي راسه الا الدجه ... خله يستاهل

2- أما خويك الروائي فلا ناقة لي ولا جمل في موضوعه بس الظاهر على قولتنا ... مشتهي ومستحي

3- حل موضوع زيادة الرواتب

1 -- b
2 -- a
3 -- d
4 -- e
5 -- c

أما جمهور الهلال مالقيت له نسبةومافهزت وش قصدك في إنه موجود هنا

عموماًً كل تدوينه وإنت بخير

Anonymous said...

الأخ أنور تعديل بسيط على مشاركتي السابقة

***تصحيح:
أما جمهور الهلال مالقيت له نسبةومافهمت وش قصدك في إنه موجود هنا

على فكرة يا أبو دوسر عجبني تعليقك

AnwaR said...

اهلا ابو دوسر ،
واختلف معاك في دور الجمعية ، اتوقع انها اثبتت نفسها في فترة وجيزه ، وما قرار تطوير السجون ، او طبع كتب عن حقوق المواطن الا بداية الطريق
نتمنى لهم التوفيق ، وترى لا تستغرب يجي يوم اشتكيك عليهم ، حب تجربه واطلاع يعني

وسلامة بطنك


اهلا اهلا ابو دانة
ياخي وينك مختفي ، شفت لك حجز على دبي في احد المواقع من فتره >>> بفضحك ، بشر كيف دبي؟

احلى شي في ردك انك كتبت الحل ، تبغى تنجح ها؟؟
وبعدين اجابتك غلط ، يعني الهلال كله ماعجبك وجوده ؟؟ ياخي شكلك نصراوي حاقد :)

تحياتي

Anonymous said...

يا خي إذا حلينا صح قلت يبغى ينجح وإذا الواحد تفائل بالنجاح تجيه درجة الإمتحان على الحافه زي حركات الجامعة
حليت صح .. ومانسيت ولا فقرة ومدري كيف وفي الأخير درجتك تكون 60% يعني موت يا حمار الدكتور مايبغا أحد يجيب فل مارك

بعدين أنا هلالي ولا لي أي علاقه بالنصر لا من قريب ولا من بعيد بس مالقيت نسبة مقابلة للهلال إلا إذا كان فيه وحده من الإجابات تقبل القسمه على 2 ممكن
بس تعرف لغة الإختبارات دائماً إختيار واحد هو الصحيح

وشكراً