كيف نختار الألوان ؟

اهلا وسهلا من جديد ، كنت في تدوينة سابقة بعنوان (مشروع تعتيق ، افكار والوان )تحدثت عن مشروعنا الصغير في صبغ ودهان البيت ، ولأننا في عصر ( جوجل) فليس لأي احد اي عذر في جهل اي شيء ، سويت كم عملية بحث ومن موضوع لموضوع ( طبعا بالانجليزي) لقيت الاف المواقع والشرح والتفصيل من الالف الى الياء واكتشفت اني فتحت على نفسي باب ، فأصبحت كمن عرف نصف الحروف ويريد كتابة رسالة ، وحاولت اطلع بفائدة بسيطة بعد اللت والعجن ( اللت والعجن عبارة فصحى) المهم ، الموضوع ببساطه يعطينا فكرة عن اختيار الالوان لأي شي يحتاج منا تنسيق الوان ، مثلا دهان البيت ، اثاث البيت ، شراء الملابس ، ترتيب باقات الزهور ، تصميم مواقع ، وكثير من الاستخدامات المتعلقة بالالوان ، الفكرة العامة انه فيه الوان تناسب الوان ، تعطي تناسق مع العين من خلال ( تقارب او تباعد) طول موجاتها وترددها وتضادها وتباينها وتعاكسها ومن هالكلام ، طبعا هذا لا يعني اننا اذا سوينا عكس كذا نكون ( جبنا العيد) ولكن فيه الجيد ، وفيه الاجود ،
الصورة في الاعلى تعرف بـعجلة الالوان او
color wheel
ظهرت قبل اكثر من مئة سنه ، وهناك قواعد ٣ بسيطة للتعامل معها وهي :

١-القاعدة الاولى : العائلة اولا ، حتى الالوان يكون ولاءها في البداية لعائلاتها ( هذي الالوان اللي فيها خير طبعا) ومعنى ذلك ان اللون يحب ان يكون مع الوان من درجاته وهي واضحة في الصورة ، وليس مهم مقدار التوزيع بينهم ، فممكن يكون بالتساوي ، يعني مثلا على الجدران يكون نص الجدار ازرق غامق ونصه الثاني ازرق فاتح ، وايضا ممكن يكون التوزيع بشكل اساسي وفرعي ، يعني يكون كل الجدار بلون ازرق غامق والاطراف والحواف تكون بأزرق فاتح ، وهكذا ، ولا بأس بثلاث درجات من نفس اللون . وهذي القاعدة هي الاسهل والاكثر امان ولحد يقدر يفتح فمه عليك :) واضح؟

٢-القاعدة الثانية : الجار بعد الدار ( غيرنا المثل للضرورة) ومعنى ذلك ، كلما قرب اللونين من بعض يكون تناسقهم افضل ، الجار الاول انسب من الثاني والثاني انسب من الثالث وهكذا وتقدر تطبق عليهم القاعدة الاولى ، بس لازم تاخذ في اعتبارك اي لون بيكون اساسي واي لون فرعي ، لأن قاعدة النصف اصعب هنا وتحتاج حس عالي . واضح ؟

٣- القاعدة الثالثة: اللي يقابلك احسن من اللي جنبك ( مدي وش ابغى بهذي القاعدة ) وهذي اقرب القواعد الى قلبي وهو ان تأخذ اي لون وتشوف اللون اللي يقابله في الصورة ، هذي اللونين عكس بعض ( والضد يظهر حسنه الضد) وهنا لابد ان يكون احد اللونين هو الاساسي والثاني فرعي ، يعني لا يجوز استخدام قاعدة النصف هنا ، ويمكن ايضا الابداع اكثر ( والحذر اكثر ) واستخدام ثلاثة الوان تبعد عن بعضها نفس المسافة ، وايضا ، هنا لابد ان يكون الاساسي لون ، والفرعي لونين ، وتحتج حس ( خطير ) عشان تضبطها

قبل الرحيل : لا ننسى اللونين الابيض والاسود ، يحلون كثير من المشاكل وتقدر تولفهم مع اي قاعدة ذكرناها

اخيرا ، هذي مجرد اجتهادات تعتمد بشكل كبير على حاسة الذوق ، والذوق شيء يتأثر بالطبيعة والمكان والزمان والنفسية والمزاج وحتى الثقافة ، وهذي كلها امور نسبية ، يعني مافي صح مطلق ومافي خطأ مطلق ، بس المهم الواحد يكون عنده الثقه في اختياره

نتتظر تفاعلكم